ክንክን ጥዕና ካብ ማእከል መቐበሊ ኣጋይሽ

እቲ ሕክምናዊ ኣገልግሎት ቈጸራ ክሕዘልኩም እዩ። ባዕልኹም ምስ ካብዚ ማእከል ወጻኢ ዝርከብ ወሃቢ ክንክን ጥዕና ቈጸራ ክትሕዙ እውን ትኽእሉ ኢኹም። ነዚ ብመገዲ መርበብ ሓበሬታ ወይ ብኦንላይን መተግበሪ ጌርኩም ክትገብሩዎ ኣለኩም። ወይ ድማ ናብቲ ወሃቢ ክንክን ጥዕና ብምድዋል ክትገብሩዎ ትኽእሉ ኢኹም።

ቈጸራ ምስ ካብዚ ማእከል ወጻኢ ዝርከብ ወሃቢ ክንክን ጥዕና ምስ እትሕዙ ኩሉ ግዜ ንሕክምናዊ ኣገልግሎት ሓብሩ። እቲ ሕክምናዊ ኣገልግሎት፡ ኣብ ግዜ ምርመራ ነቲ ሓኪም እትህቡዎ ናይ ክፍሊት መረጋገጺ ወረቐት ክህበኩም እዩ። እዚ ናይ ክፍሊት መረጋገጺ ወረቐት እንተሃሊዩኩም ዝኾነ ክፍሊት ኣይትኸፍሉን ኢኹም። 

ናይ ሆስፒታል ቈጸራ

ዶክተር ወይ ነርስ ብክኢላ ዶክተር ንመርመራ ወይ ኣብ ሆስፒታል ንምድቃስ ናብ ሆስፒታል ከመሓላልፉኹም እዮም።

ኣብቲ ሆስፒታል ባዕልኹም ቈጸራ ክትሕዙ እውን ይከኣል እዩ። ኣብ ሆስፒታል ቈጸራ ክትሕዙ ከለኹም፡ ኩሉ ግዜ ነቲ ኣብ ማእከል መቐበሊ ኣጋይሽ ዘሎ ሕክምናዊ ኣገልግሎት ኣፍልጡ። 

ከምኡ'ውን ኣብ እዋን መርመራ ተርጓሚ የድልየኩም እንተኾይኑ ነቲ ሆስፒታል ሓብሩ።

ኣብቲ ሆስፒታል ኣብ እትምዝገቡሉ መዓልቲ ናይ ዶክተር መወከሲ ደብዳቤ ከምኡ'ውን ኣራንሾኒ ካርድኹም ወይ ካልእ ናይ መንነት ሰነድ ተማልኡ። 

እቲ ሆስፒታል መጀመርታ ካብ Fedasil እቲ ዘድሊ ሕክምናዊ ክንክን ክትረኽቡ መሰል ከምዘለኩምን ዘይብልኩምን ክምርምር እዩ። ገለ ሕክምናዊ ኣገልግሎት ቅድሚ ናይ መንግስቲ ኤጀንሲ ጥዕና CAAMI-HZIV ወጻኢታት ምሽፋኑ ካብ ናይ Fedasil ዶክተር ፍቓድ የድልዮ እዩ።

ብ Fedasil ድሕሪ ምፍቃዱ፡ ናይ ጥዕና ኤጀንሲ CAAMI-HZIV ኩሉ ሕክምናዊ ወጻኢታትኩም ብቐጥታ ነቲ ሆስፒታል ክኸፍልዎ እዮም። 

ካብ ፋርማሲ መድሃኒት ምውሳድ

ኣብ ፋርማሲ፡ እቲ ብዶክተር ዝተኣዘዘልኩም መድሃኒት ክትወስዱዎ ትኽእሉ ኢኹም። 

እቲ በዓል ሞያ ፋርማሲ ብዛዕባ ኣጠቓቕማ እቲ መድሃኒትን ከስዕቦ ዝኽእሉ ጎናዊ ሳዕቤናትን ክገልጸልኩም እዩ።

ናብ ፋርማሲ ክትከዱ ከለኹም ኩሉ ግዜ ናይ ዶክተር መአዘዚ ወረቐት ከምኡ እውን ኣራንሾኒ ካርድኹም ወይ ካልእ ናይ መንነት ሰነድ ሒዝኩም ኪዱ። 

እቲ በዓል ሞያ ፋርማሲ መጀመርታ ካብ Fedasil እቲ ዘድሊ ሕክምናዊ ክንክን ክትረኽቡ መሰል ከምዘለኩምን ዘይብልኩምን ክምርምር እዩ። ገለ ሕክምናዊ ኣገልግሎት ቅድሚ ናይ መንግስቲ ኤጀንሲ ጥዕና CAAMI-HZIV ክፍሊት ምሽፋኑ ካብ ናይ Fedasil ዶክተር ፍቓድ የድልዮ እዩ። ድሕሪ ናይ Fedasil ፍቓድ፡ ናይ ጥዕና ኤጀንሲ CAAMI-HZIV ናይ መድሃኒት ወጻኢታት ብቐጥታ ነቲ ፋርማሲ ክኸፍልዎ እዮም። 

ከምኡ'ውን ካብ ፋርማሲ ናይ ሓኪም መአዘዚ ወረቐት ዘየድልዮም፡ ንኣብነት ከም ጸረ-ቃንዛ ዝኣመሰሉ፡ መድሃኒታት ክትገዝኡ ትኽእሉ ኢኹም። ብዘይ ናይ ሓኪም መአዘዚ ወረቐት መድሃኒት እንተገዚእኩም ግን፡ ሙሉእ ወጻኢ ባዕልኹም ክትከፍሉዎ ኢኹም።

ናይ ሕክምና ፋክቱር እንተመጺእኩም ከ?

ካብ ዶክተር፡ ፋርማሲ ወይ ሆስፒታል ናይ ክፍሊት ሕቶ እንተመጺእኩም፡ ብዝተኻእለ መጠን ቀልጢፍኩም ኣብቲ ሕክምናዊ ኣገልግሎት ቈጸራ ሓዙ። ኣባል ሰራሕተኛ ናይቲ ሕክምናዊ ኣገልግሎት ክሕግዘኩም እዩ።